COP29-un Yaşıl Zonasında yekun tədbir COP29-un irsinə həsr olunub

Noyabrın 22-də, COP29 konfransının sonuncu günündə, Yaşıl Zonada “Gələcəyin Qurulması: Azərbaycanda və Dünyada COP29-un İrsi” mövzusunda panel müzakirəsi təşkil olunub. Tədbir COP29 Azərbaycan Əməliyyat Şirkəti və COP29-un Yaşıl Zonadakı Tekstil tərəfdaşı “GILTEX” şirkətinin birgə təşkilatçılığı ilə baş tutub. Panel konfransın uzunmüddətli təsiri və COP29 irsinin formalaşmasına həsr edilib. 

11 gün davam edən konfransın yekununda keçirilən bu müzakirə, COP29-un yerli və qlobal səviyyədə dayanıqlı inkişaf və iqlim dəyişmələrinə qarşı mübarizə sahəsində qoyduğu mirası diqqət mərkəzinə çəkib.

COP29 İrsi Təşəbbüslərinin rəhbəri Ceyhun Atayevin moderatorluğu ilə baş tutan panel müzakirəsində Azərbaycanın COP29-a ev sahibliyi etməsinin dayanıqlı inkişaf üzərindəki uzunmüddətli təsirləri diqqət mərkəzində olub. “GLOBE International” şirkətinin baş direktoru Malini Mehra, Azərbaycan Sahibkarlar Konfederasiyasının baş icraçı direktoru və COP29 Təşkilat Komitəsinin üzvü Natəvan Məmmədova, BMTİP-nin Dayanıqlı Maliyyə Mərkəzinin direktoru Markos Neto və Azərbaycan Tekstil Assosiasiyasının İcraçı Direktoru Fəridə Axundovanın iştirak etdiyi panel müzakirəsində Azərbaycanın bu qlobal əhəmiyyətli tədbirə ev sahibliyi etməsi və yaşıl keçidi sürətləndirməsi, qlobal tərəfdaşlıqlarını gücləndirmək və iqlimə dayanıqlılığını artırmaq məqsədilə öz rolunu necə istifadə etməsi müzakirə olunub. İştirakçılar Azərbaycanın iqlim liderliyi sahəsində uzunmüddətli və davamlı bir miras yaratması üçün mövcud olan imkanlar barədə öz fikirlərini bölüşüblər.

Müzakirə zamanı həmçinin korporativ ESG (Ekoloji, Sosial və Korporativ İdarəetmə) sahəsində irəliləyişlər, bərpa olunan enerji və innovasiyalara investisiyanın qoyulması, dayanıqlı, eyni zamanda aşağı karbonlu gələcək qurmağa yönəlmiş siyasət dəyişikliklərinə də toxunulub.